BULACAN – Wala pang isang araw matapos pagnakawan ang isang fastfood restaurant sa lalawigan, dalawang suspek ang naaresto ng mga operatiba ng Bulacan Police Provincial Office (PPO) sa isinagawang hot pursuit operation sa Brgy. 175, Caloocan City noong Nobyembre 10.

Ang pag-aresto ay nag-ugat sa isang insidente ng pagnanakaw na iniulat noong Nobyembre 9, 2025, sa nasabing fastfood restaurant sa Bustos at Sta. Maria, Bulacan.

Sa mabilis na pagtugon at koordinasyon ng Santa Maria Municipal Police Station at iba pang operating unit sa ilalim ng Bulacan Police Provincial Office, matagumpay na natunton ng mga awtoridad ang getaway vehicle at naaresto ang mga suspek sa kanilang hideout.

Narekober sa operasyon ang sumusunod: isang kulay-abong Toyota Avanza; dalawang set ng plate number (NIQ 9065 at -NIF 4547); isang .38 caliber revolver na kargado ng mga live ammunition; cash na nagkakahalaga ng P10,000 na perang papel at P13,000 sa sari-saring barya kasama ang ilang mga kagamitan at personal na gamit na pinaniniwalaang ginamit sa paggawa ng krimen.

Samantala, pinuri ni PRO3 Director PBGen. Ponce Rogelio I. Peñones Jr., ang mga miyembro ng Bulacan PPO sa pangunguna ni Provincial Director PCol. Angel Garcillano, sa agarang aksyon ng mga operating unit, na ang mga resulta ay sumasalamin sa propesyonalismo at disiplina ng puwersa ng pulisya ng Central Luzon.

“Ang mabilis na operasyon na ito ay nagpapakita kung gaano kabilis ang koordinasyon, pokus, at dedikasyon na nagiging resulta. Dahil sa pagbabantay ng ating mga pulis, napigilan natin ang grupong ito na mag-target ng mas maraming establisyimento,” ani Peñones.

Idinagdag niya na ang operasyon ay naaayon sa focused agenda ni Acting PNP chief, PLt. Gen. Jose Melencio C. Nartatez Jr., na nagbibigay-diin sa Enhanced Managing Police Operations (EMPO) at Integrity Monitoring — mga framework na nagtataguyod ng intelligence-based, proactive, at transparent policing.

“Sa ating pagpasok sa abalang panahon ng Yuletide, patuloy na hihigpitan ng PRO3 ang mga operasyong panseguridad sa buong rehiyon upang matiyak na ang ating mga komunidad at lokal na negosyo ay mananatiling ligtas at protektado,” giit ng nangungunang pulis ng Central Luzon.

(ELOISA SILVERIO)